ના મિત્રો, કાતરી વેચવાનો ધંધો ચાલુ નથી કર્યો હજુ. કદાચ કરું તો જરૂર જણાવીશ.
હમણાં એક દિવસ બપોરે જમતો હતો. એક મિત્રનો ફોન આવ્યો અને વાત ચાલુ થઈ. વાત વાત માં વાત ડબ્બામાં રહેલી કાતરી પર આવી. ટીના મને જમવાના એક ડબ્બા માં મૂળ ગુજરાતી કાતરી (જે આપણે બાળપણ ના આમયમાં ઘેર જાતે છીણી, બાફી પછી સુકાવતા. અને આખું વર્ષ એ વાપરતા) આપે. એ મિત્ર બોલ્યો કે બહુ વર્ષો થઈ ગયા હવે તો આવી કાતરી નથી ખાવા મળતી. મમ્મીની ઉંમર થઈ ગયી એટલે એ હવે ના કરી શકે આ બધું. અને પત્ની જોડે સમય નથી. હવે તો બસ તૈયાર ચિપ્સના પેકેટ મળે.
એટલે હું બોલ્યો કે આ તો ટીનાની મહેરબાની છે કે આ બધું બનાવે અને ભરી આપે છે. બાકી હું પણ ચિપ્સ જ ખાતો હોત. એટલે એ બોલ્યો કે હા તારી વાઈફ જોબ નથીં કરતીને એટલે એ આ બધું કરી શકે. મારી વાઈફ તો જોબ કરે એટલે સમય ન હોય એની જોડે.
મને આજ સુધી આ ગણતરી નથી સમજાઈ કે નોકરી કરતી સ્ત્રી કેમ બહુ વ્યસ્ત હોય અને ઘર સાંભળતી સ્ત્રી ને લોકો કેમ નવરી સમજે?
એટલે મેં તરત એને પૂછ્યું કે તારી વાઈફ જોબ સિવાય કયા બીજા ઘરના કામ કરે? શુ એ કચરા, પોતું, વાસણ, કપડાં ધોવાનું, જમવાનું બનાવાનું, તારા મા બાપ ની સેવા કરવાનું, એમનું જમવાનું બનાવાનું, તારા દીકરાને સ્કૂલ માટે તૈયાર કરવાનું, એની સ્કૂલના અભ્યાસ વિશે ધ્યાન રાખવાનું, એને રોજ ભણાવવાનું, એને સ્કૂલે લેવા-મુકવા જવાનું, ટ્યુશન માં લેવા-મુકવા જવાનું, સંગીતના વર્ગમાં મુકવા જવાનું, કારીયાણું – શાકભાજી – દૂધ – દહીં લાવવાનું આવા કોઈ કામ કરે? તો એનો બધા માટે એક જ જવાબ હતો કે ના.
એટલે મેં એને કીધું કે જો ભાઈ મારી ટીના રોજ ૫:૩૦ વાગ્યે સવારે ઉઠે. પછી એ મારો નાસ્તો અને જમવાનું બનાવે. ૬:૦૦ વાગતા એ સામર્થ્ય ને ઉઠાડે અને સ્કૂલ જવા તૈયાર કરે. એને પણ નાસ્તો આપે અને સ્કૂલમાં લઇ જવા ગરમ ગરમ તાજો નાસ્તો બનાવી આપે. પછી એને સ્કૂલે મુકવા જાય. ત્યાંથી આવીને મને ઉઠાડે. પછી મને નાસ્તો બનાવી આપે. હું તૈયાર થાઉં ત્યાં સુધી મારુ જમવાનું તૈયાર કરીને ટિફિનમાં ભરી આપે. પછી એ એના, સામર્થ્ય અને મમ્મી, પપ્પા માટે બપોરના જમવાના માટે તૈયારી કરે. એ દરમિયાન એ બીજા ઘરકામ પણ પતાવી દે. ઘરની સાફ સફાઈ, ધોયેલા વાસણ અને કપડાં ગોઠવવા એ બધા કામમાં લગભગ બપોર થઈ જાય. પછી એ બપોર થતા જ મમ્મી, પપ્પા ને ગરમ રોટલી બનાવી આપે. પછી એ સ્કૂલે જાય અને સામર્થ્યને ઘેર લાવે. ઘેર આવી પછી ફરી એના અને સામર્થ્ય માટે રોટલી બનાવે. જમ્યા પછી રસોડું સાફ કરવું અને બીજી થોડી સફાઈ કરે. પછી સમર્થયાને સ્કૂલ કે ટ્યુશનમાં જે લેસન આપ્યું હોય એ જોવાનું. બપોરે લગભગ ૩ થી ૪ જગ્યા એ ટ્યુશનમાં જવું પડે એ લઇ જાય. બપોર પછી ફરીથી સાંજના જમવાનુ બનાવાની તૈયારી હોય. રાત્રે ફરી જમીને થોડું ભણવાનું અને પછી ૯:૩૦ થી ૧૦:૦૦ સુધીમાં સુઈ જવાનું.
આમાં વચ્ચે વચ્ચે જરાક કલાક કે અડધો કલાક આરામ કરવા સમય મળતો હોય. બાકી એના સિવાય આખો દિવસ દોડધામ ચાલુ ને ચાલુ જ.
આની સામે તારી પત્ની બસ સવારે તૈયાર થઈને ઓફીસ જાય અને સાંજે ૭ વાગતા થાકીને પછી આવે.
આ લાંબા ભાષણ પછી એ કઈ બોલ્યો નહીં, બસ એમ બોલ્યો કે તારી વાત બિલકુલ સાચી છે. ઘેર રહી કામ કરતી સ્ત્રીઓ પણ ખૂબ કામ કરતી હોય છે.
નોંધ: ટીના પણ ૨૦૨૦ સુધી સ્કૂલમાં શિક્ષકની જોબ કરતી જ હતી અને એની સાથે આ બધું સાંભળતી હતી. હવે કોવિડ ના કારણે જોબ મૂકી દીધી છે.